Esaterako, 2 metro koadrotan sortzen diren solasaldiak; direla kezkak, direla eguneko bizipenak, direla gomendioak…
Guztiok ere Hezkuntzan dihardugu; hizkuntzak, matematikak, informatika, hezkuntza behar bereziak dituztenak… eta, gutako bakoitzak bere arloko gorabeherak izan arren, zenbait puntutan adostasun erabatekoa agertzen dugu. Adibidez, egungo nerabe askoren egoera afektibo-emozional-psikologiko eta ondorioz akademikoaren konponbidearen ardura hezkuntza sistemarengan eta, hein handi batean, irakasleengan jartzen den pertzepzioa.
Arazo askoren iturburua etxeetan dago; nerabeek hain beharrezkoa duten arreta, zaintza, eta mugak ez ezartzean, hain zuzen. Astean, Sevillako gertakari lazgarriaren ondotik, Alicia Banderas psikologoa elkarrizketatu dute irratian, eta honako esaldi hau zizelkatua gelditu zait: "Nerabeak su geldoa behar du ongi hezia izan dadin".