Ikasi, lan finko bat lortu, ezkondu… Modu horretan erreproduzitzen da indarrean den gizarte eredua, zeinak, bestalde, bere baitan, inplizituki, gordetzen dituen gure munduaren egiturazko zenbait arazo; esaterako, gehiegizko ekoizpen eta kontsumoa, kutsadura, ekonomiaren mesedetan pertsonen zaintza gutxiestea…
Kontuan izanik gure bizitzetan "itsu-itsuan" hartu ohi ditugun zenbait erabakik zein neurritan baldintzatzen gaituzten, ez al genieke zenbait jakintzagairi propio tarte bat egin behar gure eskoletan?
Adibidez, familia bat eratu nahi denerako dauden erregimen ekonomikoen arteko ezberdintasunak, banaketa egoeren kasuistika, laneko kotizazioak eta balizko pentsioak, ekonomia etxetiarra, zergak, finantzei loturiko erabakiak… Kulturak pertsona askeago egiten duela esan ohi da. Ba, horixe; finean, bizitzarako ibilbidea argitzen lagunduko liguketen finantza, ekonomia nahiz zuzenbide zibilaren inguruko zertzelada batzuk, herritartasun kritiko eta askeago baten mesedetan.
