Etxe edo jauregi dotoreenek lorategi ikusgarria izatea derrigorrezkoa zen, estatusaren adierazle. Usondo, Errekalde, Irizar, Errotalde zein Olaso Dorreko lorategietako zuhaitz eta landareek berba egingo balute, zenbat konturi buruzko sekretuak jakingo genituen...
Urteak pasatu dira, eta ohiturak aldatu. Jauntxoek alde egin dute eta lorategiak herritar guztiontzat zabalik daude. Zuhaitzek ez digute ezkutuko istoriorik kontatuko, baina Turismo Bulegoak antolatu dituen bisitei esker kontu ugari ezagutzeko aukera izango dugu asteburuan.