... FAOk (Nazio Batuen Elikadura eta Nekazaritzarako Erakundea) mamorroak jateko gomendioa zabaldu du, intsektu-elikadurak abantailak baino ez dituela seinalatuz.
Ez dakit gure artean, egoeraren larria gorabehera, matxinsalto barbakoa edota liztor-paella modukorik inoiz ikusi ere egingo dugun. Gaurbiharretan ez dut uste. Etziko kontuak, dena dela, etziko lagako ditugu.
Baina FAOren gomendioak multinazionalen belarrietan euli-saldo baten zurrunbilo gogaikarriak baino interes zukutsuagoa sortu duela kontu seguru samarra da. Eta, jakina, lehen planak ere egiten hasiak izango dira, hau da, txindurri, armiarma, mandaeuli edo dena delakoak nola hazi, gizendu eta saldu kalkulatzen abiatuak izango dira, dagoeneko.
Amesgaizto bat ote da hori guztia? Bai zera! Multinazionalentzat, denbora-kalkulua egin ondoren, negozioa eratu eta publizitatea antolatzea baino ez dago zomorro horiek gure platereraino ekartzeko. Gero, FAOk ez dakit baina multinazionalek on egin esango digute.
