... Europako Banku Zentralaren presidente Mario Draghi italiarrak hartu du Italiako politikari pikaro eta protagonistaren txanda.
Hara zer gertatu zaion Europako Bankuburuari Erromako kaleetan. Joan den astean Draghi jauna pasieran ikusi zuten kaleetan zehar ezagunek, umeek, ostalariek, txurreroek, gaztaina-saltzaileek, kale-garbitzaileek, bideokamerek… eta den-denen gainetik begiratzen duen Jainkoaren begi bakar triangeluarrak; ez, baina, hantxe pare-parean eta erne-erne egon beharra zeukan soldatapeko udaltzainak!
Draghi Europako Bankuburu jauna, utilitario batean, sakelfonotik berbetan eta uhala lotu gabe harrapatu zuen argazkilari batek!
Orain, hedabideei esker, mundu osoak dauka pasiera horren berri. Gertatuak gertatu, trafiko-arauen haustura bikoitzak ez du eraginik izango Draghiren kontaduriatako batean ere: ez gidabaimenaren puntuetan, ez kontu korrontean.
Eta italiarrek zer diote auziaz? Askok, hauxe: "Gaixo, Mario! Behin irtengo paseatzera Erromako kaleetan zehar, bizkartzainik gabe eta utilitario batean, eta parte txarreko argazkilari bat fortunatu behar pare-parean! Aberatsen tribulazioek ez dute mugarik!”.