Ondorioak, baina, luze iraungo duen esperantzan da euskal gizartea, nazioarteko adituen ahaleginari sustengua emanez Euskal
Herriko hamaika indar eta erakunde Aietera inguratu izanak erakusten duen moduan.
Madrilgo gobernu sozialistak ez zuen parte hartu; lehendakaria kanpoan zen; PSOE(PSE)koa den Egiguren, aldiz, Aieten zen, alderdiarekin oso kritiko, gainera. Eta hitzak hizpidea emanik, inork badaki zer arraiotan zen P. Lopez Ameriketan? PSOE, beraz, nahi ezean, baina nahitaezean zen Aiete gainean.
Sindikatuek, patronalak, indar politikoek eta erakunde sozialek erakutsi nahi izan zuten egun nabarmen horretan (ere) bakearen aldeko mina.
Eta UPN, UPD edota PP? Horiek ixkintxo egin zioten Konferentziari. Datorren hileko hauteskundeak irabazten baditu, PPk izango du agintea Madrilen eta hilaren 17ko erabakietatik sorturiko ondorioak kudeatu beharra, baina PPko buru diren Basagoiti edota Pons modukoek betiko lepotik dute gorbata eta betiko lepotik, –hori da okerrena– burua.
