Animo, Mai! Bide honetan, harriak oztopo egiterakoan, esnea bera darionean desegiten dira harri guztiak. Ama hitza. Igartzen duzue zenbat maitasun dagoen hiru hizki hauetan? Pisatuz gero, ziur nago (infinitua+1) kilogramo adieraziko luketela hizkiek eurek, banan-banan.Gauza bera gertatzen da ama oinarekin sortutako hainbat hitzekin; besteak beste, amatasunaz. Nire bizitzatik pasarte ederrenetariko bat kontatu beharko banu, amatasunarenera joko nuke. Inongo zalantza barik!
Bederatzi hilabete gutxi gorabehera itxaron ostean, zeure laztana, zeure kuttuna, zeure umetxoa… zeure maitea aurrean edukitzerakoan, zelan esango diozu esan behar diozun guztia? Gorgoritoak egin baino lehen, aurpegi moñoñoak jarri baino lehen, "umetxo goapoena zein den?" itaundu baino lehen.
Zeinen antza duen igarri baino lehen… Zein izango ote da komunikabide onena esateko maite duzula ilargira ailegatu arte eta buelta? Esateko hor egongo zarela une onenetan eta txarrenetan. Esateko ezetza ez dela txarra. Esateko bizitzako bideak ezagutzear dauzkala. Esateko konponbide asko daukala, elkarrekin egonez gero. Komunikabide paregabea amatasunarena dela behin erabakiz gero, besarkatzen duzu zeure gorputzaren kontra; zeure laztana, zeure kuttuna, zeure umetxoa… zeure maitea. Orduan, bularretik ateratako esne gozo-gozoaz adierazten diozu den-dena. Hori guztia eta, gainera, hau ere bai: "Ongi etorri, ene maitea". Unai , Lorena, amatxoren partetik.
--------------------
Marisol Andrade Eskoriatza