Gauza da etxea berriztu eta AirBnB edo holakoren baten iragarri dutela. ¡Nos han jodido bien! Astero jende berria dugu. Gau bakarrerako datorrenik ere bada. Gure pisuko dinamikan eragin du: antsietatea sortzen digu parekoa ez ezagutzeak, bere ordutegien berri ez izateak, bere mania eta ohituren errepasoa egin ahal ez izateak, maitaleak ezin zenbatzeak.
Astebeterako datozenekin ez dugu horrenbesteko arazorik. Bilbo bi egunetan ikus daiteke, eta hortik aurrerako bost egunetan errutina txiki bat eraikitzen dute. Epe motzeko lasaitasuna eman eta badoaz. Hurrengo etorriko direnekin eszeptiko jartzen gara, aurrekoak minimoki estimatzeagatik. Eta honetan guztian okerrena, orain, pareko etxeak gu begiratzen gaituela jakitea izan da. Fokua lekuz aldatu da. Mierda!
