"Zer moduz zaude?" galdetzerakoan "ondo" erantzun dudan aldiro pentsatu izan dut ea gezurra izan den edo ekonomia linguistikoa. Lehenengo kasuan, sudurra hazteak kezkatzen nau; bigarrenean, garatu dudan gehiegizko nagitasunak.
Beldurtzen nau lehorte garaian pantanoko tranpolinaren bakardadeak; edo gauez kraskatzearren haginak higatzeak; logelako gotelé-an Elvis-en aurpegia agertzeak.
Nik "zer moduz zaude?" galdetu izan dudan askotan, nahi baino erantzun luzeagoak jaso ditut. Halakoetan ekonomia linguistikoa erregutzeko tentazioa ezin eusteak beldurtzen nau. Finean, nik galdetu dut, ustez, erantzuna interesatzen zaidalakoan.
Beldurtzen nau, hau idatzi ostean, zer moduz nagoen inork ez galdetzeak, kezkak eta beldurrak ez bereizteak.
