Ni neu Martutene auzotik oso gertu bizi naiz, eta laster ohartu nintzen apur bat barbarotzat jotzen zutela nire hizkera. Horregatik, "zein zaila den zuri ulertzea" entzuten hasitakoan, kalean euskara batuaz hitz egiteko hautua egin nuen. Moskeorik gabe, praktikotasunetik.
Niri batua gustatzen zait, eta euskalkiak ere bai. Horregatik sufritzen dut Goiena telebistako mikrofono aurrean euskara batuarekin ezinean ari diren edadetuekin. Jakinda, gainera, euskalkian ederki moldatzen direla. Agian, galdera batuan egin zaielako izan liteke. Baina, era berean, ez dut ulertzen Euskal Herri mailako komunikabideetan batuaren ordez bailarako euskalkiarekin tematzen direnekin. Batzuei entzuten baitiet etengabe berben bila gaztelerara jotzen, aditzekin hanka-sartzeak egiten, eta, azkenean, ez bata eta ez beste. Nire belarriak, behintzat, ez du gozatzen.