Matematiketan, adibidez, zenbakiak eta kalkuluak berehala ikasten ditugu; batuketak, kenketak, biderketak, zatiketak eta beste buruketa konplexuago batzuk gauzatzeko abilezia garatuz, baina, gehienetan, matematikaren beraren zergatiari eta jatorriari erreparatu gabe.
Musika ikastean ere, abestiak jotzen eta interpretatzen ikasten dugu, baina esango nuke ez dela musika bera ikasten, ez baita filosofikoki eta estetikoki lantzen.
Argi dago denok osatzen dugun gizarte honetan abiadura handiz bizi garela, eta ikasterako orduan ere azkartasuna baloratzen dugula, baina ondo etorriko litzaiguke ikasgaien zergatiari eta jatorriari gehiago erreparatuko bagenieke, pentsaera robotikoak gogoeta filosofikoetara hurbilduz.