Bakea galdu dut aste honetan Gipuzkoan salduena den egunkarian irakurri dudan notizia batekin. Foru Aldundiak mendekotasun legean aldaketa batzuk egitea proposatu du. Berriaren arabera, dena da hobekuntza, aurrekontuaren igoera eta diru laguntzen gehitzea.
Baina albistea sakonki irakurrita konturatu naiz mendekotasun maila altuena dutenek gaur egun jasotzen duten diru laguntzaren %20 galduko dutela. Argitaratzen ez dena existitzen ez den heinean, familiak berri honekin sentitzen duena bakardadea da, gutxiespena. Neurria proposatu duenak ere ez ditu aintzat hartu mendekotasun handiena dutenak eta haien familiak, haien beharrak eta zailtasunak.
Aste honetan hizkuntza arrarorik asmatzen aritu beharrik ez dut izan, baretzeko GOIENAn idatzi ahal izan dut eta. Gomendatzen dizuet esperientzia. Beste barik. Eguberri on guztioi.
