Krisi klimatikoak, energiaren prezioen igoerak eta gure mendekotasun energetikoa murrizteko beharrak eredua aldatzera bultzatzen gaituzte. Baina aldaketa hori ezin da ez indibiduala ezta zentralizatua izan: tokiko erantzun kolektiboak behar ditugu. Testuinguru honetan, energia-komunitateek aukera baliotsua eskaintzen dute. Hauen jarduna ez da soilik eguzki-plakak jartzea; komunitatearen muina, konfiantza sortzea, erabakiak partekatzea, pertsonak aktibatzea eta ingurunea zaintzea ere badira. Energia- komunitateak burujabetza, justizia energetikoa eta bizikidetza eraikitzeko guneak dira.
Debagoienean eta inguruko eskualdeetan dagoeneko hainbat energia-komunitate sortu dira. Guztiek erakusten dute tokikoaren ahalmen eraldatzailea, pertsonen eta erakundeen arteko elkarlana, antolaketa eta lankidetza dagoenean. Hala ere, proiektu hauek biziraun dezaten, funtsezkoa da hainbat eragileren arteko konpromisoa. Gakoa ez baitago teknologia berriztagarrietan, lankidetzan aritzeko eta sareak ehuntzeko gaitasunean baizik.