Euria ari du eta badirudi zerutik era miraritsu batean ur tanta gardenak erortzeak jendearen aurpegiak aldatzen dituela. Zeruak kolore grisa hartzen du maileguz, botatzeko dagoen ur guztia isurtzen den arte, bederen. Urdinak kantsatzen hasia ninduen. Gainerako guztiek urdina gogoko dutela nabaria da, grisa baino gehiago, behintzat. Ez dut ulertzen. Ortzadarrak ere ez ditu liluratzen; soinuak ez ditu lasaitzen eta kaleetan barrena modu abstraktuan osatzen diren ur putzuak gorroto dituzte. Hemeretzi urte nahikoa al dira euria begitan hartzeko?
Ba al dira hemeretzi urte nahikoa umel dagoena lehortu daitekeela ahazteko? Ba al da denbora aski ur tantak zuhaitzetako hostoetan, loreetan, armiarma-sareetan edota etxeetako leihoetan ikustearen edertasuna aintzat hartzeari uzteko? Ez. Hemeretzi urte ez dira nahikoa inguratzen gaituena berezia dela desikasteko; gutxi da ezohikoa dena arrunt bilakatzeko, ohitzeko.
Gaur euria ari du eta ez nuen espero hodei grisak ikustea gustatuko zitzaidala
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Bidali ALTA 688 69 00 07 telefono zenbakira –Whatsapp bidez–.
TELEGRAM: Batu zaitez @GoienaAlbisteak kanalera.
Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.
