Egoera latzenetan balioesten da bidelagunen garrantzia, eta guk onenak izan genituen alboan. Bergarako osasun zentroan A. Valverde, Blanca Cebrian eta Maika Guridi –beti gauzak errazten–; Arrasateko Etxeko Ospitalizazioko talde osoa, Jesus Millas medikua, Ariane Arruti eta gainerako erizainak; Zainketa Aringarrietako taldea, Iñaki Peña buru –eskerrik asko, bihotzez–. Bizitzak goxoagoa behar luke zuen moduko pertsonentzat: business class-eko hegaldian urte oparoak merezi dituzue, traturik onenarekin.
Izenak eman ditut, eta horrek bere arriskuak ditu, norbait kanpoan gelditu daitekeelako. Baina izenak garrantzitsuak dira, pertsonen jarrerak, profesionaltasunak eta bihotzetik egindako lanak dena aldatzen duelako. Eskerrak gure osasun sistema publikoak halako altxorrak batzen dituen; zain dezagun, benetan zortedunak gara eta.
Ama entzuten dut urrunean zuendako ospitalera erreileno eta tostoiak bidaltzeko eskatzen, baina nik uste dut jendaurreko aitorpena eta esker ona direla egin daitezkeen opari onenak. Zuen lanak ez du preziorik eta ezin da merezi duen moduan eskertu. Zuek zarete gure ongizate eta duintasunaren zaindari, bizitzak zaurgarrien egiten gaituen uneetan.
----------
Larraitz Uribesalgo
Bergara
