Erosoena zelako? Agian ez. Bilbon egiten dut lan, eta orain joan-etorria egin behar dut egunero. Kosta egiten zait erabakiak hartzea, eta aitortuko dut berotu didatela burua azken hilabeteetan entzundako "ziur zaude?", "ez al dizu neke handia eragingo?" eta "txiki geldituko zaizu herria" bezalako esaldiek. Baliteke guztiz ziur ez egotea, baliteke neke handia eragitea, eta baliteke herria txiki gelditzea, baina iruditu zitzaidan horretarako momentua zela, Bilbo utzi eta Bergarara etortzekoa.
Betidanik gustatu izan zaizkit hiriak, eta banuen hiri batean bizitzeko gogoa. Dena den, noizean behin aitari botatako esaldi bat etortzen zait gogora. Erasmusera joan aurretik, aireportura bidean geundela, hauxe esan nion: "Nik uste dut ez naizela inon Bergaran baino hobeto biziko".
Zazpi urte pasatu dira ordutik, eta orain badakit beste leku batzuetan ere oso zoriontsu izan naitekeela, baina une honetan, behintzat, hau da nire lekua.
