Azkeneko lagun artekoa
Liga hasiera, gainera, gertu-gertu dute bi taldeek. Bera Berak Superkopako partidua dauka irailaren 3an Barakaldoko Zuazoren aurka eta Europako Txapeldunen Ligako atarikoa jokatuko du liga erregularra hasi aurretik irailaren 9an eta 10ean, Donostiako Gasca kiroldegian. Honenbestez, aurre denboraldi bikainaren ostean, fin-fin datoz Bergarako azken lagunartekora, lehia ofizialak hasi aurretik.
Brasilen Joko Olinpikoetan Espainiarekin aritu diren Bera Berako jokalariak Montse Puche entrenatzailearen aginduetara jarriko dira oraingo egunetan eta Bergaran minutu batzuk izango dituzte seguruen. Martitzenean hartu zuten lur Madrilen, Brasildik bueltan. Gogoratu, Eli Pinedo, Patri Elortza eta Marta Lopez dira bera beratar olinpikoak. Final laurdenetan Frantziak utzi zituzten dominak lortzetik kanpo.
Zarautz zilarrezko ligan
Zarauztarrak zilarrezko mailan ariko dira aurten, iaz mailaz jaitsi ostean. Baina kategoriako oilarrak izango dira, zalantzarik barik, txiki geratuko zaien mailan. San Adrianen aurka hasiko dute liga txapelketa ofiziala iraileko hirugarren asteburuan, baina dagoeneko lanean ari dira aurre denboraldiko entrenamendu saio eta lagun arteko txapelketa eta partiduetan.
Sarrerak txarteldegian
Sarrerak 5 eurotan salduko dira Labegaraietako txarteldegian bertan, partiduaren aurretik; 12 urtetik beherakoek, 3 euro ordaindu beharko dute.
Partidua datorren astelehen goizean aurkeztuko dugu hedabideen aurrean.
