Argazkian ageri diren Sara Martinez, Xabi Luke, Maite Arantzabal eta Nerea Madariaga dira prozesuaren bultzagileak.
Prozesu honen bultzatzailea Airez taldea da. Bertako kide Nerea Madariagaren hitzetan: "Hiri antolamenduak bizitzan duen eraginaz jabetuta, hori moldatzeko herritarren parte hartzea posible egingo duten metodologia berritzaileak aplikatzea helburu duen talde bat gara". Airez taldea sortu aurretik Berrekin. Berregin prozesuan ibilitakoak dira kideetako asko, eta bertan, hiri ereduaren eta hezkuntzaren inguruko hainbat gogoeta egin zituzten.
Haien ustez, hiri antolamenduan hutsune handia dago haurrentzako espazioei dagokienez. "Kilometroak 2016 jaia Bergaran ospatuko dela ikusita eta herritarren parte hartzean sakontzeko apustua egin nahi dutela ikusita, bertan parte hartzea aukera paregabea zela pentsatu genuen".
Parte hartzeko deia
Airez taldeko kideek datorren martitzeneko aurkezpenera joateko deialdia egin nahi diote prozesu honetan euren aletxoa jartzeko prest dagoen hiritar orori.
Gunea zein izango den definitu gabe dago oraindik. Zirkuituan zehar dauden guneak aztertzen ari dira eta erabakia laster hartuko dute. Bultzatzaileek esan dutenez, "gunearen diseinuak garrantzi handia izango duen arren, prozesu osoa da baloratu behar dena, helburua jendearen ekarpenetatik sortutako zerbait eratzea da eta".
