Nerea Madariaga Airez taldeko kideak eman dotu azalpenak.
Airez taldearen berri izan dugu. Baina zer da eta nortzuk osatzen duzue taldea?
Hiri antolamenduak bizitzan duen eraginaz jabetuta, hori moldatzeko herritarren parte hartzea posible egingo duten metodologia berritzaileak aplikatzea helburu dugun talde bat gara. Haurren parte hartzean oinarrituko diren proiektu hezitzaileak bideratu nahi ditugu, honela haurren ahalduntzean aurrerapausoak emateko.
Maite, Sara, Xabi eta Nereak osatzen dugu taldea eta hezkuntzako, arkitekturako eta ingeniaritza zibileko ezagutzak ditugun diziplina askotako taldea osatzen dugula esan dezakegu. Berrekin. Berregin egitasmoan osatutako talde bat gara.
Berrekin. Berregin prozesuan ibilitakoak zarete. Handik ateratako edo sortutako ekimena da Airez?
Bai. Prozesu horretan ezagutu genuen elkar. Nahiz eta gutako batzuk bistaz elkar ezagutu, sekula batera lan egin gabe ginen. Taldekide guztiok hiri ereduaren eta hezkuntzaren inguruko hainbat gogoeta egin izanak ginen aurrez, eta guztiok hau komunean genuela ikusita, zerbait egin behar genuela pentsatu genuen. Hortik sortu genuen gure taldea.
Talde horren ekimenez aurkeztera zatozte Blai-blai prozesua?
Bai. Gai honen inguruan hainbat gogoeta egiten ibili gara azken hilabeteetan. Hasiera batean ez genekien ondo nondik hasi… Aurten Kilometroak 2016 jaia Bergaran ospatuko dela ikusita eta herritarren parte hartzean sakontzeko apustua egin nahi izan dutela ikusita, bertan parte hartzea aukera ezin hobea zela pentsatu genuen. Azken batean, Kilometroak ikastolen jaia da, ikastola haurrak hezteko gunea da; hortaz, jaiak umeendako ere izan behar du eta beraientzat izan behar bada beraiei hitza ematea beharrezkoa da.
Noiz eta non aurkeztuko duzue?
Prozesuaren aurkezpena datorren asteartean, apirilaren 19an, egingo dugu 18:30ean Bergarako Irizar jauregian.
Norendako izango da batzar hori?
Prozesu honetara, haur, guraso, hezitzaile, dendari, zaintzaile…, orokorrean, elkarlanean oinarritutako prozesu honetan bere aletxoa jartzeko prest dagoen herritar oro gonbidatu nahi dugu. Azken batean, bakoitzak bere eremutik gai honen inguruan ekarpenak egiteko gauza da, eta geroz eta talde anitzagoa izan, lortuko diren emaitzak ere hobeak izango dira.
Azaldu zer den Blai-blai…
Blai-blai prozesuaren helburua Bergaran egingo den Kilometroak 2016 baitan haurrena izango den espazio bat eratzea da. Herriko espazio horretan eraldaketa bat egitera goaz, baina azpimarratu beharra dago emaitzaz aparte, hori zergatik eta nola egiten dugun ere garrantzitsua dela.
Zela egingo duzue, zela gauzatuko da Blai-blai?
Parte hartze prozesu bat izango da. Prozesu honek hiru fase izango ditu, maiatzetik urrira iraungo duena. Lehen fasean, diagnostikoa egingo da, arazoaren gainerako hausnarketa bat bultzatuz eta kolektibo bakoitzaren beharrak identifikatuz. Bigarren fasean, diseinua gauzatuko da, lehen fasetik ateratako ondorioak oinarritzat hartuz gauzatuko dena. Eta, azken fasea, gauzatzearena izango da.
Nork egingo du, nortzuk izango dira parte eta protagonista?
Gu, Airez taldeko kideok, arduratuko gara dinamizazio lanak egiteaz. Hortik aparte, herriko haurrak izango dira protagonista prozesu honetan zehar. Baina parte hartzeko aukera ere izango dute honen inguruko interesa duen herritar orok.
Urriaren 2an ospatuko da aurten Kilometroak 2016 Bergaran. Egun horretan gune berezia izango dute txikienek?
Bai. Prozesu honetatik irtengo den gunearen diseinua jai egun horri begira diseinatutakoa izango da. Baina prozesu honen bitartez egun horretarako egin beharreko bidea azpimarratu nahiko genuke. Hau da, bukaerako diseinuak garrantzia handia izango duen arren, prozesu osoa baloratu beharra dago. Azken batean, egunean egongo den eremua aurrez burututako prozesuaren emaitza izango delako. Aurreko prozesu osoak berebiziko garrantzia izango du; gune hau eratzeko izandako moduak berak haurren eta herritarren iritziak kontutan hartuko ditu-eta.
Zela irudikatzen duzue gune hori?
Parte hartze prozesu batetik irtengo den diseinu bati buruz hizketan ari garenez, zaila egiten zaigu aurrez irudikatzea zer izango den. Azken batean, parte hartze prozesuen helburua, jendearen ekarpenetatik sortutako zerbait eratzea delako.
Zer lortu nahi duzue?
Prozesuan zehar parte hartzen duen jendeak gunea bere sentitzea nahiko genuke. Hau da, bakoitzaren ekarpenak txertatuta izango dituen gune bat izatea izango zen ideala. Bestalde, horrelako prozesuei buruz aurreiritzi asko daude, eta prozesu honekin gustatuko litzaiguke jendeari erakustea posible dela horrelako prozesuen bidez guneak diseinatzea.
Umeen beharretara egokituko den herriko espazio bat transformatu nahi duzue. Ze espazio?
Egia esan une honetan ez daukagu guztiz zehaztuta zein izango den gunea. Kilometrotako zirkuituan dauden guneak aztertzen gabiltza eta laster zehaztuko dugu.
Gauza berria da, berritzailea? Beste toki batzuetan egin da antzekorik?
Egia da gauza berritzailea dela. Horrelako proiektuetara bideratutako parte hartze prozesuak ez dira oso ohikoak eta haurrak parte hartzea oraindik arraroagoa da. Baina beraientzat sortu beharreko gune bat diseinatzeko unean, beraien hitza entzutea guztiz beharrezkoa dela uste dugu. Azken aldian egin izan dira horrelako prozesuak, Berriatuan, esaterako, haurren jolas-gune bat ere antzeko prozesu baten bitartez gauzatu zuten.
