Aranzadi Ikastola gertu dago Kilometroak 2016 antolatzeko

Erabiltzailearen aurpegia

Aranzadi Ikastolak dena gertu du Kilometroak 2016ren antolaketa urtean murgiltzeko. Hirugarrenez Gipuzkoako Ikastolen Elkartearen jaia Bergaran, lehena egin eta 25 urtetara. Ostiralean erakutsiko dituzte arropak, eta jaiaren leloa eta irudia. Helburuen berri eman dute.

Bi eratako helburuak ditu Aranzadi Ikastolak hemendik eta datorren urteko urriaren 2ra arte, 2016ko Kilometroak egunera arte: helburu sozialak eta ekonomikoak.

Helburu sozialak

Sozialei dagokienez, herriarekin, eskualde osoarekin eta Gipuzkoarekin erakutsi nahi dute Ikastolen Elkartea mundiala dela, Aranzadi ikastola mundiala dela eta bertan parte hartzen duen jendea mundiala dela.

Izan ere, urte osoan zehar eta jaian bertan, adimen, adin, pentsaera, sentimendu, joera, jatorri, hizkuntza edota gaitasun guztiak batu eta elkarrekin lanean jarri nahi ditu Aranzadi Ikastolak, kilometroen, euskararen eta ikastolen mesedetan.

Helburu ekonomikoak

Helburu ekonomikoei dagokienez, bestalde, duela bost urte Seminarioko eraikin bakarrean ikastolako 712 ikasleak eta 62 profesionalak batzeko egindako obrei aurre egin behar izango die, eta Kilometroak baliabide ezinbestekoa izango da horretarako.

Eraikina berritzeko obrak, baina, berritze fisikoa ez ezik Aranzadi ikastolari berritze pedagogikoa ere ekarri diola adierazi dute gaur hedabideen aurrean egin duten aurkezpenean.

Aranzadi Ikastolan, honenbestez, lanean hasiak daude Kilometroak 2016 antolatzen. Dagoeneko, 15 batzorde sortu dituzte. Horietatik, esaterako, buru-belarri ari dira lanean arropa salmentakoak. Berehala hasiko dira herririk herri arropa eta osagarriak saltzen. Bestalde, denda prestatu, atondu eta azaroaren 9rako gertu egongo da Bidekurutzeta kalean.

Aurkezpen jaialdia

Oraingo egubakoitzean iluntzeko 19:00etan emango zaio hasiera ofiziala Ikastolako jolastokian egingo den ikuskizunean. Han erakutsiko dituzte Kilometroa 2016ko arropak, leloa eta irudia.

Eta Usurbilgo Udarregi ikastolaren eskutik jasotako lekukoa herriari eskainiko die, bergarar guztiei. Kilometroak denekin batera antolatu nahi dute-eta.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.