Egia esan, jendeari galdetuta, askok ez lukete jakingo zertarako ikasi behar den latina gaur, ez bada Batxilergoan Matematika gainetik kentzeko trikimailu gisa. Horregatik, ohikoa da entzutea ezagutzen ditudan Batxilergo Humanistikoko ikasleen ahotik ia inork ez dituela animatu latina aukeratzera –sarri, kontrakoa– eta batzuetan taldeak ez direla osatzen. Dena dela, latinak balio du. Balio du euskararen ondare linguistikoa hobeto ulertzeko, gaztelaniaren eta frantsesaren zuztarrak eta bilakaera ikusteko, balio du museoetako aztarnetan, monumentuetako idatzietan nahiz antzinako izkribuetan mintzo zaizkigun aspaldiko ahotsak aditzeko; baina, batez ere, balio du hizkuntzaren azpiegitura gramatikal eta morfologikoa hobeto ezagutzeko, eta, beraz, hizkuntzetan trebeagoak izateko, bai beste bat ikastean, bai dakizkigunak erabiltzean.
Hortaz, Filologia, Historia, Filosofia, Itzulpengintza… ikasteko asmoa dutenei latina onuragarria dela gogorarazi nahi nieke lerrotxo hauetan.