Kuriosoa da, baina denetariko kexen artean inoiz ez dut entzun "gaztelania inposatu egiten zaigu"; Espainiako Erresuman bizi behar dugun euskaldunok, jaiotzean, Pilarreko Amaren mirariz edo, gaztelaniaren dohaina jasoko bagenu bezala.
Ingelesa, berriz, hizkuntzarik cool-ena ei da. Batxilergoa baino lehen lortu behar da First-a, unibertsitatea baino lehen Advanced-a. Lanerako, aisialdirako eta bidaiatzeko ia ezinbestekoa izanik, ingelesa ikastea "aukeratzen" dugu, eta gogoz ordaintzen ditugu Cambridgeko matrikulak. Ezin esan inposatu egiten denik.
Euskarara iristean, baina… aditzak zailak dira, euskaltegiak ordainezinak, tituluak bidegabeak; edozein exijentzia inposizio. Betiko konplexuei damu berriak gehitzen zaizkien garaiotan, ez nintzateke harrituko politikariren batek ahalera eskolan irakasteagatik barkamena eskatuko balu.
