Dena dela, jendeak hemen ez du hori kezka handiz ikusten, nik uste. Gauza horiek Pancorbotik beherako fenomeno desatsegin moduan hartzen ditugu sarritan, eta "hemen ez dute ezer aterako" esanda lasai jarraitzen dugu poteoan.
Baina fatxa berri hauen gorakada ez da Espainiako haize bolada barregarri bat, baizik eta mundu mailan handitzen doan joera politikoa, eta, beraz, oraindik asko haziko da. Gure autonomiatxoarekin zer gertatzen den ere Madrilen erabakitzen da, eta igarri orduko kili-kolo gera daitezke gauza asko –euskarazko hezkuntza, adibidez–. Izan ere, eskuin muturra iman bat da, mapa politiko osoa eskuinerantz daramana, kate luze bat balitz bezala: VOXek PP; PPk, PSOE; PSOEk PNV eta Podemos; PNVk EH Bildu...
Izan ere, ezkerraren imana falta da. Kapitalismoaren alternatiba posible dela gogoratzea falta da.
