Imajinatzen ditut guri begira Rodrigo errege bisigodoa Guadaleten, harrituta; Konstantinopla setiatuko biztanleak zur eta lur; Vienako defendatzaileak gure aurpegira barrezka; Lepantoko marinelak sinetsi ezinik... Izan ere, Europa kristau tradizionala orduantxe egon zen benetan islamdar inperioen menpe erortzeko zorian; 711, 1453, 1529, 1571... kalifa edo sultanaren armada musulmanak Europaren bihotzean aurrera zihoazenean. Imajinatzen ditut mehatxu horiei aurre egin zietenak orain, gaztelu bilakatutako Europa honetako biztanle alienatuoi begira, erdi barrezka, erdi higuinduta.
Hor gabiltza, kaleak poliziaz beterik, gure komunikazioak zainduta, kameraz inguraturik, hesiak eraikiz, inoizko aurrekontu potoloenak armagintzara bideratuz, eta inoiz baino beldur gehiagorekin.
Arrasate ere ez da libratzen, dagokion eskalan; kaleetan kamerak jarriko omen dituzte laster, eraikin publikoak zaintzeko edo; ertzainak kalean ibiliko dira patruilatzen; udaltzainei pistolak emango dizkiegu... eta hala ere, inoiz baino beldurtuago biziko gara. Langile beldurtua otzanagoa baita.