Utikan espainiar errepublika

Erabiltzailearen aurpegia

Bergaran egon nintzen aurrekoan... eta harriduraz ikusi nuen espainiar banderen kopurua hazi egin dela normaltasun handiz, gure ibarreko hiriburuan. 

Izan ere, Espainiako legeen aginduz udaletxean dagoenari eta noizbehinka epaitegian egoten denari Fraiskozuri plazakoa batu zaie. Lehenengo biek ohiko bi koloreak dauzkate; azkenak hiru.

Iraganeko gertaerak lausotu zaizkigu, batxilergoko historia liburuek hautsa hartu ahala eta iraganaren irakurketa erromantikoak ugaritu ahala (espainiar errepublika independentziaren eta iraultzaileen Arkadiaren ataritzat saltzen duten irakurketak). Baina datuak hor ditugu. Eta bakoitzak ematen dizkien ñabardurak gorabehera, burugogorrak dira.

Gogora ditzagun Azañaren hitzok: "Si esas gentes van a descuartizar a España prefiero a Franco. Con Franco ya nos entenderíamos nosotros". Edo Negrin-enak: "Antes de consentir a nacionalistas que nos lleven a desmembraciones que de ningún modo admito, cedería el paso a Franco". Gogora dezagun birritan ukatu zigutela autonomia euskaldunoi, gerrak onartzea beste aukerarik utzi ez zien arte. Gogora dezagun Errepublikak nola zapaldu zituen 1934ko Asturiasko meatzariak, Franco jenerala bidaliz... Gogora dezagun! Eta ez gaitezen hain inozoak izan; geure errepublika da behar duguna.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira.

TELEGRAM: Batu zaitez @GoienaAlbisteak kanalera.