Zer sentipen ederra pailazo izatearena, bai horixe. Baina hainbatek arraro samar begiratu izan nau eta ez dakit zuek ere argi ote duzuen zer den benetan pailazo izatea.
Zer da pailazoa? "Umeentzako tontakeriak egiten dituen pertsonaia bat". Oker! Pailazoa harantzago doa. Pailazoak badu bere poetika eta mundu honetan egoteko arrazoia. Ez da baloratzen, ez delako komeni. Pailazoak kolokan jartzen du gizarte honen logika eta gure izaera desordenatua. Guk, pertsonok, gure ahultasunak ezkutatzen ditugu, ez gaitezen hauskorrak izan eta ez gaitzaten hautsi –itxurakeriak agintzen du hemen–. Pailazoak errealitate hau erakusten du bere izaera erreala denon aurrean erakutsiz. Pailazo batek sentitzen duena egiten du, besterik gabe. Guk nahiko genuke horrela jokatu baina...
Eta zergatik egiten dugu barre? Ez tontakeriak egiten dituelako, baizik eta erakusten digulako zer tontoak garen.