Ez kirol denda edo lehiaketa, baizik Euskal Herrian giza bikaintasunari eraiki zaion monumentu aitzinenetakoa. Oñatin, Sancti Spiritus unibertsitateko fatxadako erliebean, Herkules heroi greziarraren kondaira erakusten digu: nola bere gaztaroko obenak garbitzeko hamar froga zail (“deka athloi” greziarrez) gainditu zituen.
Berpizkundeko kultura humanistaren eredu miretsiena. Herkulesen erliebe apartaren gainean justu zizelatuak daude balore eta bertute humanisten irudiak: jakintza, kemena, justizia, fedea, maitasuna,… eta hauek erakusteko emakumezkoen eskulturak bakarrik ipini zituzten: emakumea, Errenazimenduko gizakumeen irakasle eta eredu!
Fatxadaren gorenean, erremate gisa, “Plus ultra” legenda –“Beti urrutirago”- ez da lema inperialista hutsala, baizik eta euskaldunoi XVI. mende hartan ezagutu berri zen Mundu Berrira eta mundu guztira zabaltzeko luzatutako deia, gaur ere geure mugak egunero gainditzera gonbidatzen gaituena.
