Senide asko, diru iturria txikia eta bakarra, mahaiaren bueltan generazio ezberdinak, abuelo, abuela…
Julio horrelako etxe batean hazi zen. Gisa hartan jositako bizitzak markatzen du pertsona baten bihotza, begirada, balioak. Ez naiz Julioren bizitza kontatzera etorri, ez. Gutun hau bihotzetik idatzitako eskertza gutuna da, bizitza oso baten aitortza xumea.
Buelta batzuk eman ostean, Gatzan hartu zuen aterpe Txindurri etxean, Itziarrekin batera. Eta Gatzaga bere bihotzean iltzatu zen lehen unetik. Berehala herri giroan txertatu eta konpromisoak hartzen hasi zen: Soziedadean, Udalean, ehiztarien elkartean… beti prest, beti eskuzabal. 1987tik 1995era bi legealdi bete zituen Udalean. Eta garai hau, zalantzarik gabe, Gatzagako urrezko aroa izan zen: udaletxe berria, frontoi berria, Gastainuzketa eta Garro kultur etxea, San Migel plaza eta plazako etxe berriak. Ametsak izan ziren lehenik, eta gero, errealitate bihurtu ziren, lana eta konpromisoa medio. Hori guztia aurreikusi, proiektua egin, finantzaketa lortu eta exekuzioa zortzi urteren buruan. Julio hor izan zen beste batzuekin batera, jakina, buru-belarri, nekaezin.
Lanetik urten eta ordu luzez herriaren alde. Jo ta su, harriz harri, herria eraikitzen Gabriel Arestik esango lukeen moduan. Mila esker, bejondeizula, mutil, izar berri bat piztutzera doa hire omenez.