Horietako batek zioen lotsa ematen ziola kanpoan bizi diren senideak herrira etortzen direnean. Ez herritarrengatik, ezta giroagatik ere; kale askotan ikusten diren pintaketa eta zirriborro horiengatik baizik.
Eta arrazoirik ez zitzaion falta. Ez gara benetako grafitiez edo kaleko arteaz ari. Hormetan, metalezko ateetan, pertsianetan eta baita eraikin garrantzitsuetan ere agertzen diren marra eta sinadura zentzugabeez ari gara. Horrek ez du gure herriak merezi duen irudia ematen.
Solasaldian inork ez zion errua garbiketa zerbitzuari bota. Aitzitik, denek aitortzen zuten egiten duten lanaren balioa. Arazoa ez dago garbitzen duten horiengan, arazoa zikintzen duten horiengan dago.
Amaieran, lagunetako batek honako esaldi hau bota zuen: "Askoz ederragoa izango litzateke herria margotzen dutenek ere benetan maite izango balute!". Eta, egia esan, zaila da horrekin ados ez egotea.