Batzuek behin eta berriz errepikatu digute ez dela "probokazioetan erori behar", lege eta debekuekin nahikoa dela. Esperientziak, baina, kontrakoa diosku: ezikusiarena egiteak faxismoa normalizatzen du; eta legalismoak kaleko antolakuntza despolitizatzen. Faxismoari kaleetan aurre egin diotenak kriminalizatzeak desmobilizatu eta despolitizatu egiten du erantzun antifaxista, eta garrantzitsuena ezkutatzen saiatzen da: antifaxismoa zilegi eta beharrezkoa da. Izan da erantzun antifaxista karikaturizatu duenik ere: testosterona, futbola eta gimnasioa. Klixe horrek, faltsua izateaz gain, faxismoari egunerokoan aurre egiten dioten emakume guztien borroka mespretxatzen du. Ezin diogu faxismoari zentimetro bat ere utzi gure kaleotan. Eta hau ez da ezikusiarena eginda edota baimenen bidez lortzen, antolakuntza independente iraunkor baten bidez baizik; arazoa errotik heldu, eta aurre eginez.
Hazten saiatzen diren lekuetan, erantzuna izango dute. Beste aldera begiratzeak ez du balio, antolatuta soilik egingo diegu aurre.