Gaur, apirilak 24, 83 urte betetzen dira Camilo Alonso Vega koronelak, milaka altxaturen buru zela, Elgeta-Intxorta-Kanpanzarri behin betiko eraso egin zionetik. Milaka gizon eta emakumeren erresistentzia eta etsaiaren etengabeko porrotak gorabehera, frontearen hausturak erabat zaildu zituen biztanleriaren bizi baldintzak, eta herri askoren aurka egindako gupidarik gabeko bonbardaketek haurren ebakuazio planifikatuak behartu zituzten, besteak beste.
Intxorta 1937 kultur elkartea eta Elgetako Udala haiei omenaldi instituzionala egitekoak ginen, eta erbestera joan behar izan zuten haiek gogora ekartzea zen helburua. Gerrako haurrak izenarekin ezagutzen ditugun horiek guztiak, alegia.
Bizi dugun alarma egoera dela-eta bertan behera gelditu dira prestatuta geneuzkan jarduerak, baina frankismoaren zigorgabetasunaren aurka borrokatzen jarraitzen dugu, ziur baikaude horrek egia, justizia, erreparazioa eta errepikapenik ezaren bermerantz aurrera egiten lagunduko digula. Horixe da gure omenaldirik onena gizon eta emakume erresistenteei.
