Munduko hedabide guztiek jaso dute han gertatutakoa eta batzuen barrenak mugitu eta besteon beldurrak, berriz, loratu egin ditu.
Europa osoan, Ekialde Hurbilean eta munduko hainbat herrialdetan bere eragina izan duena: Jainkoaren izenean, Jainkoa izpi txikietan, alegia, umorezko aldizkari baten kazetariak erail egin dituzte.
Horren ondorioz, manifestazio erraldoia antolatu dute Parisen eta, hain zuzen ere, hantxe ikusi ditugu Europako mandatariak herritarren aurretik, ondo bereizita argazkian ateratzeko.
Bada, horrekin lotuta, gauza bi, gutxienez, harritzekoak dira, nire ustez:
Lehenengo eta behin, argazkian agertu ziren agintari horietatik, zenbatek euren nazioetan ez ote duten adierazpen askatasunaren aurkako ekitaldiak egiten. Baina, jakina, argazkian atera behar...
Eta beste alde batetik, Parisko atentatua gertatu aurretik, eta hau ere Jainkoaren izenean eginda, Nigerian (Afrika), 2.000 pertsona akabatu zituzten eta hedabideetan ia ez zuen oihartzunik izan.
Oso harritzekoa egiten zait eta nire buruari galdetzen diot: heriotza maila desberdinak al daude?
Hau da, garai bateko "primerako eta segundako" hiletak egiten ziren moduan, gaur egun ere, prezio desberdineko heriotzak al daude?
Berriro ere, Afrika bigarren mailako kontinente egiten ari gara. Dituzten aberastasunak "lapurtu" eta pertsonak, berriz, "bost axola".