Bermea

Erabiltzailearen aurpegia

Tresna, makina edo zerbitzu bat erosi duen orok badaki erosketa egin eta denbora tarte baten, dela 12 edo 24 hilabeteko, bermea izango duela. Fabrikazio akatsen bat bada konponketa hori ekoizleari dagokiola; betiere, kontratuko letra txikiak kontutan hartu behar, zer sartzen den eta zer ez jakiteko. Ez zaizu gertatu berme denbora pasatu berri delako tresna hori izorratu, eta zu berarekin? Poltsikotik ordaindu behar konponketa!

Duela hilabete batzuk inauguratu zen Antzuolatik lapur zubiraino doan bidegorria. Ez nuen espero halako arrakastarik izango zuenik; izan ere, antzuolar eta bergarar asko ikusten da oinez zein bizikletaz aldapan gora eta behera.

Kontua da denon poltsikotik erosi dugun bidegorria pitzatzen hasia dela Burubiko pare inguruan. Hasieran, asfalto gainean pitzadura txiki bat agertu zen, baina gero eta nabarmenago da lurra hondoratzen doala, eta, horrela jarraitzen badu, laster zulo handi bat ikusi beharrean gara. Ez dakit halako azpiegiturak egiten direnean ekoizleak zein berme eman behar duen, baina izango da heldulekuren bat kontratuan. Arazoaren berri eman nahi dut, ez bada jada ezagutzen, eta, gainera, berme denbora iraungi baino lehen. Ez dadila inor etorri "lehenago esan izan bazenute" eta halakorik esaten. Dagokionari eskertuko diogu neurriak hartzea, kalte handiagoak egin baino lehen; aurrez, mila esker.

----------

Joseba Iparragirre

Antzuola

Debagoieneko albiste garrantzitsuak edo azken ordukoak telefonoan jaso gura dituzu?

  • Bidali ALTA 688 69 00 07 zenbakira Whatsapp bidez.
  • Batu zaitez Telegrameko @GoienaAlbisteak kanalera.