"Ez da frogatu gaixotasunik sortzen duenik", esaten dute batzuek, baina alderantziz pentsatu beharko genuke: zeharo frogatu artean wifiak gure seme-alaben osasunean ondoriorik ez duela, badaezpada, eskoletan kableak erabil ditzatela.
Ondorengo lerroetan, kontuan hartzeko informazioa:
1. International Agency For Research On Cancer agentziak kutsadura elektromagnetikoa gizakiontzako ustezko minbizi-sortzaile gisa sailkatu du –2B taldea–: mugikorrak, wifia....
2. 2011ko maiatzaren 27an, Europako Kontseiluko Parlamentu Biltzarraren ebazpena aipatzen zuten. Ebazpen hartan, haurren babes handiagoa lortze aldera, kable bidezko Interneteko konexioei lehentasuna ematera zuzendutako gomendioa gaineratu zen.
3. Arartekoak, 2013ko apirilaren 4ko ebazpenean, kablea erabiltzeko gomendioa egin zuen.
Zenbat gaixo-hildako egon behar dira gomendioei kasu egiten hasteko?
Frantzian, aurtengo ikasturtean, mugikorrak debekatu dizkiete 15 urtetik beherako ikasleei; pausotxo bat gazteen osasunaren alde. Espainiako Erreinuan noiz uste duzu hartuko dela antzerako neurriren bat?
Badaezpada, zuek hartu zuen neurriak eta zuen etxeak babestu itzazue, kutsadura elektromagnetikoa sortzen duten aparatu guztiak itzalita
----------
Josu Garitaonandia
'Oparitu zuhaitz bat' egitasmoaren arduraduna
Bergara