Izan ere, Europa erdia baino gehiago pikutara joan zitekeen beste eztanda bat egon izan balitz.
Planeta osoaren erradioaktibitate mailak gora egingo zuen, eta minbizia eta beste gaixotasun batzuk gehitu.
Hangoek ausardia handiz lan egin zuten, beraien bizitzaren eta osasunaren kaltetan, milioika pertsona salbatzeko; hau da, ez dira ahaztu behar 500.000 pertsonak lurretik, 10.000 meatzarik lur azpitik, 600 pilotuk airetik eta hiru urpekarik egindako lana.
Hasieratik, autoritateen jarrera beti izan da istripuaren eraginak gutxitzea; harrezkero, informaziorik eza eta gardentasun falta izan dugu, ez dakigu aipatutako ausart talde horren egoera, edota Europako biztanleriaren osasunean istripuak eragindako ondorioak.
Ez dago ausarta izan beharrik arrisku nuklearra gutxitzeko; kontsumo arduratsuan dago kakoa.
Garbi daukadana da ez diedala argindarrik erosiko zentral nuklearrak erabiltzen dituzten argindar enpresei.
Eta zuk zeini erosten diozu argindarra?
----------
Josu Garitaonandia
Oparitu Zuhaitz Bat egitasmoaren arduraduna
Bergara