Gero eta jende gehiagok ditu arazoak etxebizitza era egokian izateko: udan hozteko, neguan berotzeko, ur beroa izateko, janaria berotzeko, eta abar. Horrek eskatzen duen energia ezin dutelako ordaindu. Horri, pobrezia energetikoa deritzo.
Osasun arazoak ekar ditzake, batez ere, pertsona nagusietan; haien heriotza tasa igo egiten da eguraldi hotza edo bero zakarra egiten duenean. Estatuan, %15 inguru dira egoera hori jasaten duten pertsonak.
Europako Ekonomia eta Gizarte Batzordeak (CESE) aholkatzen du energia deszentralizatzea, energia berriztagarriak erabiliz; izan ere, etxebizitza guztiek behar duten energia sortzeko ahalmena izango balute, inor ez litzateke pobrezia egoera horretan egongo.
Aldaketa sakon horiek ez dira gertatzen, enpresa handien interesak babesteko, baina pauso txiki batzuk eman dira, legea aldatuz, egoera horretan daudenei energia hornidura ez mozteko.
Lehendakariaren esanetan, industriaren lehiakortasuna ere kolokan dago energiaren prezio altuagatik; izan ere, Europako garestienetakoa da.
Egoera horri aurre egiteko, ez da nahikoa argindar enpresa handien aurrean protesta egitea norberaren lantegiak arazoak dituenean.
Eredu energetiko berri baterako plataformak aholkatzen du kooperatiba energetikoei energia erosteko eta daukagun energia potentzia txikitzeko.
----------
Josu Garitaonandia
Oparitu Zuhaitz Bat egitasmoaren arduraduna
Bergara