Mila esker Oñatiko herriari eta beste askori!

Erabiltzailearen aurpegia

Ez dakit nondik hasi. Txundituta utzi nauzue. Duela bi hilabete pasatxo, omenaldiaren asmoa jakinarazi zenidatenean ere, hitzik gabe, berba barik geratu nintzen. Eta orain, aste luze, oparo eta hunkigarri hau igaro ondoren, zer esan erakutsi didazuen adiskidetasuna eta maitasuna eskertzeko? Ezkutuan eta sekretuan antolatu duzue urtebetean zehar, dirudienez, nire meritu apalak goraipatzeko asmaziño eder hau. Dozenaka pertsona, talde eta erakunde inplikatu duzue amets polit hau gauzatzeko. Ez duzue lan makala hartu!

Ez nuen uste herrian eta inguruetan hain maitatua eta estimatua nintzenik. Izan ere, nik, gehienok bezala, akatsak, gabeziak eta faltak baititut, eta ez gutxi. Ondotxo konturatzen naiz. Ez dut horiek aitortzeko eragozpenik eta norbaiti kalte egin badiot barkamena eskatzeko. Baina horiek alde batera lagata, nire alderdirik onenak hartu dituzue kontuan. Ezin dizuet egoki adierazi zer-nolako poza barneratu didazuen zuek, antolatzaileok eta, aldez edo moldez, omenaldian parte hartu duzuen guztiok. Itxura batean, karga bat izan da niretzat, baina zama arin eta atsegina. Ni apur bat gazteago sentitzea lortu duzue.

Beraz, denoi eskerrik beroenak ematea besterik ez zait gelditzen. Ez noa izenik aipatzera, zerrenda luzeegia osatuko lukeelako eta hartarako orrialde osoa beharko nuke eta. Guztiok zaituztet gogoan: senide, adiskide, herritar, elkarte, erakunde, komunikabide eta bestelakoak, Oñatikoak, Debagoienekoak eta Euskal Herrikoak. Besarkada estu bat den-denoi eta mila-mila esker!

----------

Jerardo Elortza

Oñati

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.