Hilabete pasa nuen Thailandian. Ni eta nire motxila. Bakarrik. Zergatik ez? Betidanik probatu nahi izan dudan zerbait izan da. Esperientzia ahaztezina. Norbere buruarekin denbora gehiago eman, pentsatu, ikasi, ezagutu, eta inguruko jendearekin harremanak egin. Zoriontsu izan, bizi garen estres mundutik, egun gutxi batzuetatik bada ere, distantzia hartuz. Begiak itxita berriz egingo nukeen zerbait izan da. Eta egingo dudana, ziur!
Ausarta? Abenturazalea? Ikasteko eta ezagutzeko grinaduna? Ez! Nire inguruko jende askok inkontziente baten modura ikusi naute. Are gehiago, emakume izanik.
Bakarrik bidaiatzeak ez du esan nahi lagunik, familiarik ez duzunik, ezta gutxiago ere. Bakarrik bidaiatzea nahi duzuna, nahi duzunarekin eta nahi duzunean egiteko askatasuna izatea da. Guztioi, baina bereziki emakumeei, motxila beldurrez hustea, ausardiaz betetzea eta munduan ibiltzea gomendatzen dizuet. Bizitzan behin bada ere, probatu!
