Eredugarriak omen diren Mondragon taldeko kooperatibek behin eta berriro erakutsi digute beraien interes bakarra ekonomikoa dela. Kapitalismoaren aurpegi atsegina erakusten digute, eta, aldi berean, lan sindikalaren faltagatik langileak eskubiderik gabeko zenbaki huts bihurtu dira. Kuriosoa da: etika eta morala askotan aipatu arren, holakorik ez daukatela erakusten dute egunerokoan. Mondragon taldeko laugarren printzipio kooperatiboan, adibidez, kapitalaren izaera instrumentala aldarrikatzen dute. Bitartean, kooperatibista gehienen pentsioak kudeatzen dituen Lagun Aro guztien aurrezkiekin espekulatzen ibiltzen da. Hipokrisia ederra!
Mondragon taldeko kooperatibak, elkarte anonimo bilakatzeko bidean, beraien benetako aurpegia erakusten dabiltza azken urteotan. Adibide asko dauzkagu. Estatu espainoleko pertsonaia ilun eta ustelenetakoaren gonbidapena Arrasate bisitatzeko punturik gorenetarikoa izan da ibilbide horretan. Euskal Herriak ez ditu holako kooperatibak merezi eta nahi.
----------
Joxemi Campillo
Kooperatibista ohia
Aramaio
