Urtebetetzeei buruz hausnartu nahi nuke gaur, horien paradigma aldaketaz: zentralitatea izatetik zeharka igarotzera.
7 urterekin merendolak genituen, pelotazos eta txorizopamplona banketeak. Aldi berean, lehenengo marjinazioak ere bai: "Zu ez zare nere merendolara inbitauta, zu bai, eta zu ez". Hogei urte gehiagorekin, ia-ia ez dut agurtzen nire merendolara etorri zen hura, eta kuadrilla erdia barazkijalea da.
8 urterekin hamar manamentuak baino azkarrago memorizatzen genituen gainontzekoen urtemugak. Urteak pasa ahala, konturatzen zara ez zarela munduaren zilborra, inor ez dela zure egunaz gogoratuko, ez bada Facebooktar Leial kategoriakoa. Duela dozena bat urte egindako eskola-trukean ezagututako autobus gidariak irribarrea ateratzen dizu urtero, happy bday izar have a lovely day enjoy idatziz. Facebooktar Leialek ez dute inoiz huts egiten, zin dagit.
Zure eguna gustatu edo ez, adin batetik aurrera esaten den horri men egin beharko: "Bueno, inportantiena betetzia". 27 urtekoen klubean sartuko naiz laster, eta honen inguruan ere ez dut txisterik egingo, Winehouseren eta Joplinen izenean.