Badatoz Gabonak! Nola ez zenuten sentituko, bada, turroiak duela hiru hilabete hasi baziren saltzen. Oporrak, afariak eta magia: badator, bi astez bada ere, zoriontsu izateko tartea.
Hala ere, Sara Ahmedek definitutako feminista aguafiestas edo izorratzailearen rola hartu beharra dut, barkatu. Hainbesteko magiak ez dit ongi ikusten uzten, kaleko Gabon kantek ez didate ondokoa ongi entzuten uzten. Nolanahi ere, betaurrekoak jarrita –miopea naiz–, erraz ikus daiteke Gabonetan eskaintzen den zoriontasun edo disfrutearen eskeman ez direla denak kabitzen.
Fabrika handi batzuetako produkzioa gelditu ezin den bezala, zaintza lanek ere ezin dute deskantsua izan, eta deskantsurik ez izateak esan nahi du gozamenerako denbora murriztu behar dela derrigorrez. Interna gisa ari diren etxeko langileak, erresidentzietako langileak, ospitalean gau eta egun lanean dabiltzanak, etxez etxeko laguntza zerbitzua ematen dutenak. Zuek egiten duzuena da magia, eta ez duzue mago beharrik; lan eskubide duinagoen beharra baizik. Zuengatik, zorionaren eskema berregituratuko dugu, eta lapurtu zaizuen gozamena itzuliko dizuegu.