Historiaren progresu edo aurrerabidearen ideia kritikatu nahi zuen. Hegoak zabalik dituen aingerua ageri da koadroan, eta, Benjaminen hitzetan, iraganeko hondamendiei begira dago. Aingeruaren desira iraganean puskatutakoa berriz konpontzea da, baina aurrerapen deituriko urakanak bultzatzen du etorkizunera.
Batzuetan ahaztu egiten zaigu aurrerapena eta ona ez direla, nahitaez, sinonimoak. XX. mendean bazegoen etorkizuna utopiarekin lotzeko ohitura, baina, egun, distopia-zaleagoak gara. Are gehiago, distopia apokaliptikoan bizi garela esatera ausartuko nintzateke. Pelikula gehiegi ikusi ditugu eta apokalipsia zonbiekin erlaziona dezakegu, baina distopiak gaurko errealitatearen antz handiagoa dauka.
Angelus Novus-i gertatu bezala, gu ere urakan formako haizeteek bultzatzen gaituzte etorkizunera. Hala ere, orain arteko tonu apokaliptikoa leundu nahian, garaiz ote gabiltza urakan-haizeen intentsitatea baretu eta nahi dugun lekurantz hegan egiteko?
