Laso, Artola, Peña, Imaz, Mariezkurrena eta Jaka bertatik bertara ikusteko parada izan genuen. Izugarrizko planta dute, tamaina ederra eta soberako koiperik ez.
Partidua ikusirik, ikaratzekoa da zein abiadura eragiten dioten pilotari eta nola ailegatzen diren frontoiko bazterretara.
Sasoi betean daudela esan dezakegu.
Urtean zehar partidu dezente ikusi ditut, asko binakako txapelketakoak ere bai, eta nabaria izan da, partidua luzatu denean, pilotariek arazoak izan dituztela; kalanbreak eta giharretako beste arazo batzuk, adibidez.
Usobiagak 2003an argitaratutako lanean zioen binakako partidu baten iraupena, batez beste, 67 minutukoa dela, eta pilotari bakoitzak, media moduan, 187 pilotakada ematen dituela.
Beharbada, gauzak zerbait aldatu dira azken hogei urteetan eta zenbakiak handiagoak dira, baina kurioso egiten zait pilotari profesionalak giharretako arazoekin ikustea.
Kirol gogorra dela esan dezakegu, are eta gehiago, banaka jokatuz gero, baina non dago sekretua?
Ohituta gaude bi, hiru edo lau orduko tenis partiduak ikustera, egun batzuetan bi partidu ere jokatzen dituzte, eta hauen kasuan giharretako arazoak, agertzekotan, beranduago agertzen dira.
Jakin badakit ez dela berdina tenisa eta eskupilota, baina prestakuntza fisikoan, hidratazioan, janarian zerbait hobetzeko modua egon daitekeela etortzen zait burura.