Ekimen pribatu bat izanik haren sortzaile, ukaezina da ongizate publikoaren aldeko apustua eta herri oso bat batzeko duen gaitasuna.
Gogoan ditut umetatik Korrika Oñatitik igarotzen zen momentu haiek, baita eskolan egun handia baino lehen egiten genituen lanketak; abestia behin eta berriz jarri, beste urte batzuetako kantak entzun, petoak margotu eta euskararen egoeraz hitz egin. Finean, nazio izaerari buruz jarduten genuen. Euskara gure bizkarrezurra delako; gure nazioaren bizkarrezurra.
Sarri, euskarari altxor izaera ematen diogu. Nire iritziz, aldiz, erakusleiho batean dagoen harribitxitzat hartu beharrean, aberasgarriagoa litzateke denon ahotan dagoen, erabileraren ondorioz aldatu egiten den eta gure beharren arabera moldatzen den tresnatzat izatea. Hura ikastea garrantzitsua baldin bada ere, are garrantzitsuagoa delako euskara erabiltzea.
