Oles ole melodiaz, naturari gorazarre egitekoa. Basoari iritsi zaio, loaldiaren ostean, nagiak askatu, bekarrak garbitu eta aharrausi egiteko denbora. Zuhaitzek besoak luzatu, zozo eta birigarroek kantuari txorrotxio. Lurrari makilak kolpatu, aro berria da zabalduko. Heldu da heldu, horratio, azeri eta otsoak dantzari hasteko ordua. Entzungo du berriro, bederen, ama naturaren taupada hotsa mundu osoak. Barrez lehertu, kolorez, musikaz, pasakalleetan, jiran-biran, buelta eta dantzan! Kaleak irriz, festa-giro, gozamen, atsegin, pozkario, burrunban, eztandan! Neska-mutil, zahar-gazte, ume-nerabe primeran, tope disfrutatzeko egunsenti, arratsalde, ilunabar nola ordu txikiak. Torrada, txorizo, sagar, txokolate, iturritxo eta txoritxoak, ura pil-pil, makilak eskuetan haurrak, etxekoandre, gizon zabalak, solte, biribilka, zein gerritik helduta ondo pasaz. Iritsi dira kinttadak, urdelardero, inauteri, desfile, mozorroak...
Katea eten barik, pozez txoratzeko momentuak. Bizi-bizirik antzinako usadioak, plaza, erromeria, kale eta landa-auzoak. Irribarrez, umorez auspotuz gure hizkuntza, festa eta herrietako bizitzak! Ieup!