Kaleko emakume behartsu eta zapaltzaileen soinua: pank, pank. Sorgin irrintzi eta katu marrumak. Amaraunak astindu, hautsak harrotu. Gogoak ematen diguna egin, nahi dugun hori izan. Nigatik, zugatik, higatik, gugatik…
Txirula baten antzinako doinutik arratoi, mamorro, har, arkakuso… oro, trikitixa dantzan. Ja, ja. Mariren kobazulotik entzungo diren burrunbak. Amorru, haserre eta gose aieneak. Gure amen zuloetatik mundu berri honetako zulo guztietaraino, izarrak piztu eta eguzki-ilargi kosmosa kantuan: urdin, beltz, txuri, hori, laranja, arrosa... Taup-taup, taupada urduriak gure bihotzetan. Listua dariela, txikle-bonba leherketen eztandak, ezpain lizun gorri-goxo leun azukreztatuetan. Gorroto beroaren eta maitasun eztiaren zapore likatsua. Sorgin erratzak dantzan, begiak bor-bor, sasi-zulo guztien gainetik, laino zuri guztien azpitik guztiok airean hegan. Hegan, beti beti… hegan.