Larunbatean denok Bilbora!

Erabiltzailearen aurpegia

Urtarrilaren 22an, giza eskubideen urraketa basatiaren aurrean Bilboko kaleetan gure askatasun nahia zabalduko dugu Bizitza Plataformak antolatutako manifestazioan, 17:00etan, Casillatik abiatuta, STOP diktadurarako pasaportea eta Askatasuna lelopean. Geroz eta agerikoagoa da herritarron ezinegona; ikusi besterik ez dago azken asteetan Euskal Herriko txoko askotan izandako mobilizazio jendetsuak.

Txertatze esperimental masiboaren bidez ezarri den pasaporte lotsagarri hau ez da osasun kontua –agintariek onartu duten gisan–; kontrol soziala eta diskriminazio larria da gure egunerokoan bizitzen ari garena. Inoiz ezagutu gabeko totalitarismoari atea irekitzen dio txartel honek, itzulerarik gabeko atea, pertsonen kontrola eta digitalizazioa eskutik hartuta. Gaur, gure txertaketari buruzko informazioa eskatu nahi digute tabernan sartzeko, eta bihar zer?

Denborak erakutsi du, aurrez, inposatutako dekretu askok legea urratzen zutela, eta pasaporte hau ere ilegala da, hainbat tratatutan jasota ditugun oinarrizko eskubideak urratzen dituelako. Ehunka urtetan lortutako eskubideak defendatzeko ordua da. Zer esango diegu gure ondorengoei, beldurragatik denari uko egin geniola?

Instituzio, alderdi eta eragile ezberdinei ozen esango diegu: ez dugu herritarren kontrako abusu gehiagorik onartuko, ezta diskriminaziorik ere. Auzolanaren bidez kontrol sozialerako pasaporte hau gelditzeko gonbidapena luzatzen diegu herritarrei, Bizitzako taldeetan antolatuz, erakunde eta norbanakoak informatuz… Geroz eta gehiago, larunbatean ikusiko dugu elkar Bilboko kaleetan!

----------

Irati Mujika Larreta

Aramaio

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.