Hori al da Trumpen aurrean makurtzearen prezioa? Trumpi zuzendutako Imazen hitzak entzun eta irudiak ikusi nituenean sekulako auzo-lotsa sentitu nuen. Une batez, euskaldunok historian zehar izan dugun jarreraz gogoeta egin nuen. Agian, harrotasunez –ez harrokeriaz–, historia horren errepasoa egin ahal dugu, Orreagatik hasita, frankismoaren aurrean izandako jarreraraino. Repsoleko buruak egindakoa ez dator bat euskalduntasuna sentitzeko modu horrekin. Eskerrak batzuek jakin izan dutela gertaera penagarri hori modu barregarri baten azaltzen. Horixe da Vaya semanita-ko gidoilariek aurrekoan eskaini zigutena; alegia, bizkarreko minak sendatzeko "Josu Jon Imazen ariketak".
Sokrates handiak ere erakutsitako moduan, umorea eta ironia ikaragarrizko arma boteretsuak dira. Ildo positiboago batetik begiratuta, Larramendiko lorpenagatik zorionak bergarar guztioi eta, bereziki, Larramendiko Arnasa eta Ekologistak Martxan taldekoei. Erne, saiatuta, gauza inportanteak ere lortzen dira. Bide beretik ere, gora Baskonia!