Horrelako bi, behintzat, joan zaizkigu Bergaran azken hilabete hauetan. Bietan, sentsazio bera izan dugu; urteak pasatzen dira eta gizarteak bere bilakaera izaten du. Denbora aurrera doan heinean ahaztu egiten zaigu gaur egun duguna aurretik eginikoaren ondorioa dela eta herrikide batzuek ahalegin berezia egin izateak berebiziko garrantzia eta eragina izan duela egoera horretara iritsi ahal izate horretan.
Eskerrak ematen dakien herriak pertsona horien ekarpenaren neurria gogoratu, ezagutarazi eta aitortu egin behar duela uste dugu.
Hori dela eta, idatzi xume honen bidez gogora ekarri nahi izan ditugu joan zaizkigun bi herritar hauek zer eman diguten bergararroi.
Uda partean, ekainean, Jesus Jauregi –igeri monitorea– joan zitzaigun Arroan. Bergarar ugari agertu ginen bere hiletan. Herritar askok argi daukagu gaur egun dugun eta 50 urte betetzera doan Igeri Elkartea berari zor diogula, hein handi batean.
Pilar Lonarbide irakaslea hil da urrian. Pilarri, Eskola Publikoaren euskalduntze bidean, lehen urrats berri eta zail haietan eragile izatea egokitu zitzaion; euskalduntze prozesua orokortzeko ahaleginetan ipuinen erabileran eta lanketan oinarritutako metodo berri bat eraiki zuen Pilarrek Haur Hezkuntzako ume erdaldunekin euskaraz aritzeko. Ikusi makusi deituriko baliabide aberats hau argitaratua ere izan zen eta Euskal Herriko ikastetxe guztietara hedatu zen.
Agur, Jesus; agur, Pilar. Eskerrik asko!
Eta mila esker, beraiek bezala, eguneroko lan isilarekin guztiontzat onura izan diren edota izaten ari diren ekarpenak egiten ari zareten guztioi.
----------
Josune Alberdi eta Iñaki Artola
Bergara
