Ez dut nahi edota ezin dut gaia-ri buruz propio hitz egin. Zertaz idatzi orduan? Horra hor post-it berdeetan bururatu zaizkidanak: Kanadako beroaldia, Alemaniako uholdeak, Mediterraneoan suteak, Ternua urtzen… Errefuxiatuen kanpaleku erraldoiak, Mediterraneoa, Bidasoa… Dagoeneko urperatutako gaiak. Isil-isilik telefoniako antenetako 5G aparailuak gure kale eta mendietan. Munduko aberatsak gero eta aberatsago; pobreak gero eta pobreago. Afganistan, 20 urte igaro eta gero hau! Fosfatoa eta gasa Sahararen negarra, nazioartearen lotsa. Argindarra urrearen pare eta gu auto elektrikoaren ametsarekin. Estatu eta herrien belaunaldietarako zorpetzea, hipoteka eta etorkizuna. Itxitako denda txikien atarian SEUR furgoneta ugari.
Gertuko aberastasunaren suntsitzea, lanaren prekarizazioa, norbanakoaren ezereza, kontrola eta ahuldadea. Deseraiki berrabiarazteko. Gaixotasunaren medikuntza versus osasunerako medikuntza. Zientziaren manipulazioa eta manipulazioaren zientzia. Goobels-ek ere amestu ezin izan zuen ingeniaritza soziala. Eugenesiaren berpizkundea. Pentsamendu bakarra, diziplina eta akritikotasuna. Itzuliko ez den iraganari begira jarri etorkizuna ikus ez dezagun. Indarkerien areagotzea, emakumeen aurkakoaz gain; ni-gu ez dena onartu ezin!
Eta hemen, herri-lotsen multzora: Zubietan isil-isilik dioxina eta furanoa. Zaldibar ahaztua eta Joakin bertan. Suntsiketa eta txikizioa Angiozarren, Elorrion, Atxondon … Euskaltel-en antzera ez izana/ez izena ez duten auzolan zapuztuak. Gure Osasun Sistemak agerian utzitako ahuldadea. Euskal Hezkuntza Sistemak 12 urtez emaitza eskasak eman izana. Euskararen erabileran makalaldi luzea.
Lekutan geratzen ari dira herrien eta norbanakoen erabakitzeko eskubideak, pentsatzeko eta adierazteko askatasuna.
Post-it berdeak, agian, ez ziren egokienak oraingoan. Zutabe bakarrerako titular ugari. Mariano Ferrer faltan sumatzen dut!
